يا جماعة انا بقالى فترة كبيرة وانا متابعة مدونات كتيرة وبقعد ساعات اقرأها والفضل فى ده يرجع لبرايد صاحبة مدونة عايزة اتجوز هى اللى عرفتنى عن طريق المدونة بتاعتها بباقى المدونات وبقيت مدمنة قراءة مدونات وكان نفسى اكتب عن كل اللى جوايا وافضفض واسجل كل احداث ايامى بحلوها ومرها بس بصراحة مكنتش عارفة ازاى اعمل مدونة ودورت على طرق عمل المدونة ولقيتها سهلة خالص والحمد لله انا بدأت اهوه اكتب بس ياريت تخليكوا معايا علشان برضه انا لسه بحبى فى عالم التدوين وفيه حاجات كتير مش عارفة اذا كانت مظبوطة ولا لأ عموما اهى محاولة وان شاء الله تنجح واستمر فى الكتابة
أنا فرحانة أوى بصدور أول بوست ليا وطمعانة فى ردودكوا عليا
بس حتى لو مردتوش اكيد ليكوا عذركم لأنكم متعرفوش عنوان مدونتى اكيد
عموما مستنياكوا يا حبايبى
سلام
هناك ١٦ تعليقًا:
انا لقيت مدونتك بالصدفة و دخلتها علشان فيها ريحة حد من اسكندرية
وبالصدفة بردو حكون اول تعليق
يا رب يكون وشحي حلو عليكي و المدونة تتملى تعليقات
بالتوفيق و تحياتي
مبروك على المدونه الجديده
عقبال الجريده اليوميه D:
الف مبروك يا نانو..
انا كمان وصلتلك من عند برايد
و ربنا يسعد ايامك يارب و يهديكى و ايانا كل الخير
بحب اسكندريه و كل الاسكندرانيه جدا جدا جدا
فاكيد هحب مدونتك
بالتوفيق باذن الله
أسكندرانى فى الغربة:
شكرا على ردك السريع وعلى رأى المقولة صدفة خير من الف ميعاد وانا سعيدة جدا بتعليقك يا بن بلدى وحالا حضيف لينك مدونتك عندى لانى مدخلتش عندك قبل كدة ويارب تستمر فى متابعة مدونتى وأكيد وشك حلو عليا.
Egypt eyes :
ده انت طلعت مصرى واسكندرانى كمان لأ وايه وزملكاوى يعنى أحنا متشابهين فى حاجات كتير عموما شكرا ليك على تعليقك وأمنيتك ليا بالجريدة اليومية ولو انها كبيرة قوى قوى عليا
great wishes:
شكرا يا حبيبة قلبى على تعليقك أنا دخلت مدونتك وعاجبتنى جدا جميلة بسم الله مشاء الله عليكى
ومدام انتى بتحبى اسكندرية جدا جدا جدا كده ييقى كل الأسكندرانية بيحبوكى وانا اول واحدة بحبك
مبروك يا نانو على المدونة والفضفضة بس لو ممكن بلاش أسلوب copy من برايد بخصوص شكل المدونة وانا واثق ان عندك ستايل غير برايد مش بقول أحسن ولا أوحش خدي بالك ومتفهميش غلط انا بقول انتو الاتنين حلوين وطعمين والله بس برايد فراولة تبقي انت مانجة - مثلا - ولا عنب..
ويا رب أشوفك في بيت العدل عن قريب انشاء الله
عندك شرط معين فيما يتعلق بالسن؟
مصري أصلي
صعيدي تجميع القاهرة
تحيه ليكى من قلب سيدى بشر العامر
إزيك يا نانو .. حلو اوى الواحد يقابل واحدة اسكندرانيه بميت راجل زيك كدة . انا كمان من اسكندريه .. تحديدا سيدى بشر.. مصمم مواقع ومدونات وصحفى. .. واضح انك بتحبى الصحافه ودة معناه اننا ممكن نتعاون مع بعض كويس اوى
اهلا بيكى فى عالم الفضاء التدوينى الى اكيد نور بيكى , وياريت تشوفى المدونه بتاعتى
www.demaghy.blogspot.com
وتقوليلى رايك فيها ايه , وابقى ضيفى ايميلى عندى .. ياريت نبقى صحاب .. دة يعنى لو تحبى
specialist_man@hotmail.com
سلام
غير معرف :
الله يبارك فيك وشكرا على تعليقك وملاحظتك
أنا غيرت أستايل المدونة أهوه بس والله انا مكنش قصدى انى انقل او أعمل زى أستايل برايد أنا لما جيت أختار الأستايل من الأنماط الجاهزة المختلفة عجابنى ده جدا فعلشان كده اخترته لكن لو حيوصل الموضوع لنسخ وكلام من كده فأنا بعتذر ليك ولبرايد وبعدين أعذرونى أنا لسه مبتدئة وانتم معايا بنقدكم وملاحظاتكم أن شاء الله نخلى المدونة فى أحسن شكل عموما نورت المدونة وشكرا لك
mohamed hamdy:
الله يسلمك, شكرا على الكلام الجميل ده واهلا بيك وبأهل سيدى بشر كلهم دخلت مدونتك وايه كل ده انت طلعت دماغ كبيرة قوى بس لازم أقرأه كل مواضعيك علشان يكون حكمى صائب ويكون رأيى سليم بس من البداية انت فنان مدونات وبعدين يا عم انت واحد صحفى كبير حنيجى جنبك فين بقى شكرا لك يا محمد وسيبنى أستمتع بمدونتك على راحتى
مبروك عليكي وعلينا
وعقبال الف بوست
محمود على :
الله يبارك فيك وشكرا على دخولك المدونة
مبروك
الأفتتاح يا نانو
وعقبال البوست ال100
sabrina :
ميرسى ليكى شرفتى المدونة
أنا دخلت عندك النهاردة فى مدونتك جميلة جدا المدونة بس طبعا ملحقتش أقرأ كل بوستاتك
قرأت بس أخر بوست وعلقت عليه
مبروك يا نانو متاخره 4 ايام بس معلش
ربنا معاكي وبالتوفيق يارب
على فكره البلوجريه الاسكندرانيه كتيير
تعالي عندي حتلاقيني حاطط لهم ليسته لوحدهم دول طبعا مش كلهم دول اللي عترت عليهم
تحياتي ليكي وموفقه باذن الله
أسكندرانى أوى:
الله يبارك فيك ولا يهمك نورت على كل حال مدونتى المتواضعة
انا دخلت مدونتك كتير قبل كده وفعلا عندك ليسته بالسكندرييين ربنا يزيدهم يا رب
وشكرا ليك
مبروك يا نانو ولو إن أنا لسه تاني يوم ليه هنا
زي ما تقولي تايه و مش عارف أعمل ايه فياريت حد يدلني و يبقى ليه الأجر و الثواب
مهندس مصري:
الله يبارك فيك ومبروك عليك مدونتك أنا دخلتها أمبارح ويارب يزداد عدد زوارها ومتوهش ولا حاجة أنت بقى يا باشمهندس كل اللى عليك أنك تزور مدونات على قد ما تقدر وتعلق على بوست مثلا من كل مدونة وكل مدونة حتدخلها حتلاقى ليستة فيها بعناوين مدونات تانية من واحدة لوحدة وبتعليقاتك مدونتك حتتعرف والناس حتدخلها وتعلق عندك ويمشى الحال ده كل اللى أقدر أفيدك فيه نظرا لأنى برضه لسه مستجدة وأهلا بيك فى مدونتى وفى كل المدونات
إرسال تعليق